So4Food 四季好煮意 5. 雞翼篇第三回: 韓式辣雞翼

So4Food 四季好煮意 5. 雞翼篇第三回: 韓式辣雞翼

今期So4food,又喺講雞翼! 相信有人會開始質疑小編喺咪淨識煮雞翼……但喺我敢大膽假設,每個家庭平均每個禮拜最起碼會食一次雞翼,所以希望每個禮拜出一次嘅So4food可以為你地帶嚟新靈感。不過放心,下期將會有新嘅食材。

講起「韓式」,大家都可能會聯想到深紅色嘅韓國辣椒醬(Gochujang)。佢嘅用途好廣泛,無論喺整豆腐湯、韓式炒年糕、泡菜炒豬肉等都會落,但因為通常都淨喺落一兩匙羹,所以盒醬往往用咗幾次之後,就會放喺雪櫃某個角落,慢慢咁、好孤獨咁等待過期。為咗解救佢被成盒棄置嘅命運,大家可以試下以下食譜。

韓國辣椒醬(Gochujang),其實佢嘅用途好廣泛,大部分韓國辣嘅料理都會用到。

材料

雞翼(大概20隻)

鹽 (少許,因醬汁偏鹹,所以1-2茶匙左右就夠),黑胡椒 適量

生粉 (想雞翼脆身D,可以選擇上粉焗或炸,做法可以參考之前是拉差雞翼/南乳雞翼嘅食譜)

醬汁(將以下材料攪拌):

韓國辣椒醬(Gochujang)  2湯匙

蒜頭 2瓣 切碎

豉油 2湯匙

煮食用糖漿4湯匙

麻油 1湯匙

辣椒粉 1湯匙 (可自由選擇放唔放)

 

做法:

  1. 雞翼洗淨,並用廚紙抹乾,用鹽及黑胡椒作適當調味。
  2. 將平底鍋(唔黐底)燒熱,放進大概一湯匙油及少許麻油,並放進雞翼(先煎皮),以中至大火煎大概4-5分鐘後,翻另一面再煎3-4分鐘。然後再翻向皮多煎3分鐘左右,確保雞翼煎至金黃色。將雞翼撈起備用。
  3. 用廚紙將平底鍋抹乾淨,並將醬汁倒進鍋中,燒至微滾,將雞翼放入醬汁,攪拌。可以上碟。

點綴: 可以灑芝麻//花生碎食用

將醬汁煮至焦糖化,但因醬汁濃縮了,會變得稍鹹,所以視乎口味,可以加減豉油的份量

 

Search